O le motu o Apolima o se tasi lea vaega o le atunuu ua aapa iai le lima fesoasoani o le Malo o Iapani e ala i le faatupeina o se fale apisaga e tomaaga ai aiga pea oo ina lofia i faalavelave faalenatura ma le fesuiaiga o le tau oloo molimauina i le taimi nei.

I pepa o faamatalaga mai le Ofisa o Iapani i Samoa nei, o lenei poloketi sa faatupe lea i lalo o fesoasoani poloketi i nuu ma afioaga ale Malo o Iapani ma sa sainia ai lenei fesoasoani i le amataga o le tausaga nei.

I le sauniga o lenei faamoemoe, na tauaaoina ai e le Amepasa o le Malo o Iapani i Samoa nei SENTA Keisuke lenei maota i le sui o le afioaga ao molimauina e aiga ma le auvalaaulia.

O le maota lenei e tasi le potu tele, lua potu laiti, o se vaega o le maota e teuina ai meatotino, o le umukuka. o fale le taua e fa ma se tanevai oloo ua maea fausia mo le suavai maua ua maea faatotogaina e sulu agai ai le afioaga i taimi o faalavelave faalenatura.

Ua tele tausaga o faagasolo pea fesoasaoni a le Malo o Iapani ele gata i poloketi faapenei ao le itu tau i aoaoga ma nisi o auaunaga oloo ua aapa ai le aao foai o lenei atunuu e ala lea i le faatumau o faigapaaga ma le Malo o Samoa.

O le tausaga e 1991 na amata ona aumai ai fesoasoani ai le Malo o Iapani mo Samoa i soo se atinae e mai i lena tausaga ua 224 poloketi ua maea faataunuu elenei atunuu i lona tau aofia e $42 miliona tala Samoa.