O le Asosi o tagata faigaluega i le iunivesite o le Pasefika o loo finau atu faasaga i le faamālōlō o le ta’ita’i o iuni o tagata faigaluega e le pulega a le Iunivesite.

I se pepa o faamatalaga fai faatasi a le Asosi a le University of the South Pacific (AUSPS) ma le USP Staff Union ua faailoa ai o le Sui Faaao o le Iunivesite ma o le peresetene foi o Pal Ahluwalia ua ia osofai iuni o tagata faigaluega ma le saolotoga e tautala ai e ala i le faauma o le konekarate faigaluega a le peresetene o le Iuni, Dr Tamara Osbourne Naikatini i le aso 9 lea o le masina nei.

Fai mai le pepa o faamatalaga ua faamālōlō e Ahluwalia, Dr Tamara ona o lona talanoa i le aufaasalalau e uiga i le faatinoina o mea aemaise o le toe faafouina o le konekarate a Ahluwalia i le lua tausaga lea o loo iai pea i le taimi nei.

Fai mai le iuni o le faamālōlō o Dr Tamara o ia foi o se faiaoga Biology ua osofai ai lava e Ahluwalia le aufaigaluega ma ua tatau ona toe faafoi ane i lona tofiga.

O le tali a le Iunivesite i le mataupu lea ina ua fesiligia e le RNZ, ua ta’ua ai i se pepa o faamatalaga, o mataupu ia e lē faatalanoaina ma isi e ese mai ia i latou o loo aofia ai.

O le 2019 na lipotia atu ai foi i talafou sa tipoti ese ai Ahluwalia mai Fiti ona o se osofaiga na faia faasaga ia te ia e leoleo Fiti ma le immigration ona o lona faailoaina o tuua’iga o faiga lē sa’o i lalo o le faigamalo i lea taimi ma o Me o le tausaga nei lea faato’ā toe foi ane ai i le nofoaga o le iunivesite i Suva.

Puna o Faamatalaga: https://www.rnz.co.nz/international/pacific-news/522377/attack-on-freedom-of-speech-usp-staff-call-out-ahluwalia-for-sacking-union-president