O folasaga ma finauga faaletulafono a loia o itu auai i le su’esu’eina o le lu’i faaletulafono a le vaega faaupufai e Puipuia Aia Tatau o Tagata (HRPP) ua fesiligia ai le tofia o Ta’ita’ifono o Komiti o Fono Faavae, ua mae’a i le Aso Lua.
Ua tālia ai nei se aso e aumai ai se faai’uga a le Faamasinoga Maualuga. O le afioga i le Faamasino Sili, le afioga Satiu Simativa Perese, ma le afioga i le Faamasino, le afioga Leiataualesā Darrel Clarke, sa feagai ma le iloiloina o mau sa folasia mai le Aso Gafua na amata ai su’esu’ega a lea faamasinoga.
O itu sa auai i le iloiloga o le Vaega Faaupufai e Puipuia Aia Tatau o Tagata, o le pati o le Faatuatua i le Atua Samoa ua tasi, o lē sa avea ma Palemia le afioga Fiame Naomi Mataafa, o le itu a le Vaega Faaupufai o le Samoa ua Potopoto, ma le itu a le Loia Sili a le malo.
O loo fesiligia i le talosaga a le vaega faaupufai e puipuia ai tatau a tagata le filifiliga o taitaifono e mafua i le suia o le faiga faavae a le malo mai le paea’iga talu ai a le palemene sa tuusa’o ai i sui faipule o itumalo palota e 51 le tofiga Ta’ita’ifono o Komiti o Fono Faavae.
