O faafitauli o loo tutupu i le lotoifale o nisi o itutino tau taaloga i Samoa ma vaemanua ai tapenaga a ‘au masii a le atunuu ua tatau ona faamuta, ae taula’i le atina’e o soo se taaloga i le tulaga e manuia ai alo ma fanau a Samoa aemaise o le malo ma le tapua’iga a le atunuu.
O le aotelega lea o le finagalo o le ta’ita’i o le malo, le afioga i le Palemia i lana saunoaga i le sauniga na tufatufa ai meaalofatupe mo tagata taaalo faapea ‘autaaalo sa faamanuiaina i pine auro i Taaloga a le Pasefika i Solomona i le tausaga e 2023, faapea ma taaloga faavaomalo o le pii ma taaloga siisii u’amea mamafa a le lalolagi sa faia i le tausaga nei.
O le saunoaga foi lea a sa momoli ai ma upu faalaei’au i le ‘au masii a le atunuu i Taaloga a Malo o le Taupulega e faia i le vaiaso fou i Sikotilani i Peletania.
Le afioga i le Palemia susuga Laaulialemalietoa Leuatea Polataivao Fosi.
O faailogatupe ua tauaao e i latou sa maua pine auro i taaloga a le Pasefika i le tausaga e 2023, faapea taaloga o le pii ma le siisii u’amea mamafa a le lalolagi i le tausaga nei, e 2 afe tālā mo le tagata e to’atasi ae tasi le afe tālā mo le faiaoga.
O ‘autaaalo sa pine auro e fā afe tālā le taui tupe, o se tufatufaga ua faaalu ai le tinoitupe e 190 afe tālā sa tuuina atu e le malo mo lea faamoemoe.
Se vaega o le saunoaga mai le Pelesetene o le faalapotopotoga o taaloga a Samoa le SASNOC le afioga Tuaopepe Jerry Wallwork i le tufatufaina o taui tupe mo tamafanau a le atunuu ma ‘au sa manumalo i pine auro i taaloga a le Pasefika i Saute i le 2023, faapea ma taaloga faavaomalo i le pii ma le siisii u’amea mamafa sa faia i le tausaga nei 2026.
