Ua mae’a ona tuuina atu i luma o le faamasinoga folasaga faaletulafono a le loia a le itu a leoleo o loo talosaga ai e faaaogā le faamatalaga tusitusia o le molimau a Papalii Sia Figiel ua maliu, i le su’esu’eina o mau a leoleo e lagolago ai moliaga e 19 o loo molia ai Lise Marie Schmidt ona o le tusi sa ia ave i le Ao o le Malo ma le Komesina o leoleo ua mae’a lona taimi galue, sa faailoa ai ni tuua’iga o aafiaga o lē sa avea ma Palemia le afioga Fiame Naomi Matā’afa i le maliu o le tama’ita’i o Caroline Sinavaiana Gabbard.
O le Aso Tofi o le vaiaso nei sa faia ai folasaga a le loia a leoleo ma le loia mai fafo o loo tula’i mo lē ua molia ma ua faatulaga ai le Aso Gafua, 27 o Iulai e aumai ai se faai’uga o lea talosaga a leoleo o le a iloa ai le talia ma le lē talia.
O loo molia Lise i moliaga o le faia o faamatalaga sesē, o le taufaaleaga ma le faalavelave i le faia o le amiotonu e māfua i le tusi sa ia ta’ua ai sa faatonu o ia e lē sa avea ma Palemia e nanā nisi o mau e fesoota’i i le gaioiga na maliu ai Caroline Sinavaiana Gabbard.
O le mae’a o su’esu’ega a leoleo i le moni ma le faamaoni o tuua’iga i le tusi na faia ai moliaga e 19 o loo teena uma e lē ua molia.
O Aperila o le tausaga nei na ulua’i valaau ai le talosaga a leoleo ma tuu avanoa ai le faamasinoga i le loia a lē ua molia mo se tali i le talosaga.
