Faamaonia moliaga o le faalemigao i le faamasinoga o le 26 o tagata sa lē oo e fai molimau i le tagi tau palota a Falealili 1

Ua aumai le faai’uga a le Faamasinoga Maualuga sa su’esu’eina moliaga o le faalemigao i le faamasinoga poo le contempt of court sa tuua’ia ai le 48 o tagata palota o le itumalo palota o Falealili 1, ina ua lē usita’i i le poloa’iga e tula’i e molimau a o su’esu’eina le tagi tau palota a lea itumalo.

I le aofa’iga e 48 sa molia, o le luasefuluono o i latou ua faamaonia moliaga ma ua faasala tupe.

E to’asefulufitu ua poloa’iina e totogi le 500 tālā ae to’avalu e totogi le sala e 200 tālā ma e tatau ona oo atu i le ta o le 12 o le aoauli o le Aso Lulu, aso 12 o le masina fou o Aokuso ua mae’a ona totogi i le ofisa o faamasinoga a latou salatupe.

E to’atasi mai lea aofa’iga o se tinā ua faamaonia le moliaga ae ua lē faia iai se faasalaga ona o tulaga o loo aafia ai lona soifua mālōlōina i gasegase o le tino.

Ia i latou o loo salatupe i le lima selau tālā ua aofia ai ma se tamalii sa avea ma sui faipule o le itumalo i se paea’iga ua mavae a le Palemene.

E to’a luasefulu i latou sa molia ua lē faamaonia moliaga.

E na o le 46 tagata sa mafai ona su’esu’eina o latou moliaga ma faia iai le faai’uga ae o le isi to’alua e maua ai le 48 tagata sa tuua’ia, o le isi ua maliu ae o le tasi e le’i maua lona tusi samania.

O taualumaga o su’esu’ega a le faamasinoga sa molimauina ai i le tele o faamatalaga a nisi sa molia, e to’alua tagata sa faailoa atu ia i latou e toe foi ua lē oo se faamasinoga, le māfua’aga sa lē auai ai e molimau.

O ia tagata e to’alua e le’i aofia ia i latou sa molia ma ua faia ai le poloa’iga a le faamasinoga e tuuina atu i le ofisa o le Loia Sili mo le faia iai o ni moliaga solitulafono ma ia tuuina atu i se ofisa loia tuma’oti e finauina ia moliaga i le faamasinoga ae lē o le ofisa o le Loia Sili.

O le mae’a ona su’esu’eina o lea matāupu tau faamasinoga ua faamauina ai o se matāupu muamua lea ua tagofia e le Faamasinoga Maualuga ua pito to’atele ai nisi ua molia i le solitulafono o le faalemigao i le faamasinoga.

Ua faamauina foi le maua ai e le ofisa o faamasinoga o se aofa’iga e 10 afe ma le selau tālā mai salatupe uma o le a totogi.

Tagata molia ua faasalatupe i le $500 tālā

1. Malili Nofo Vaega
2.  Faamotuletia Seu (leai se salatupe ona o aafiaga i gasegase)
3.  Suaese Fiso
4. Lena Sharon Paulo
5. Feleti Nai
6. Galusina Feleti Fiti
7. Ioane Fuivelo
8. Ulima Simiti
9. Vavae Fuialo
10. Mouga Manu
11. Salvation Edwin
12. Tepatuanai Faauuga Fiva
13. Levasa Fuipo Elisaia Leavasa
14. Soi Lalovi
15. Matuaitoga Bob Sooalo
16. Aumua Isaia Lameko
17. Aukusitino Pe’a
18. Taveuveu Aso Samoa

Tagata molia ua faasalatupe i le $200 tālā

1. Iulieta Elu Talaapitaga
2. Rosa Lemusu
3. Sosefina Elama
4. Tiafau Laifai
5. Tusa Fatu Timo
6. Taua Faafua Elekana Tupou
7. Faamativa Pita Joe
8. Savali Taunuu

Tagata molia ua lē faamaonia moliaga o le faalemigao i le faamasinoga

1. Lalotoa Mataafa
2. Lealasa Tafaoimalo Agaese Pinati
3. Vaiola Malu
4. Vaiuta Lolesio Ofisa Ioane
5. Meleane Iosia
6. Savai Itutolu Leilua
7. Seufaleupolu Apelila
8. Elenoa Faaleaga
9. Faai’uga Fiavae Taumate
10. Kirisimasi Mino
11. Koli Moemauso
12. Ogeai Aliu
13. Leotele Patea Taamale
14. Saline Laumata Faalogo Pouvi
15. Arona Tafafao
16. Kerisimasi Faalata Tamaletoa
17. Lalelei Soi
18. Poulogo Esera
19. Sia Molia