E tolu telefoni o le ituaiga o le Iphone ma le masini o fesoota’iga televavave faaonaponei le Ipad a se aiga i Vaiusu na gaoia i se gaioiga na tupu i le vaveao a o tofafā lea aiga.
O le isi fale o le aiga sa tofafā ai nisi o le fanau tama a le ulugalii na osofa’i foi ma gaoia ai telefoni Samsung e 2 ma o le tau aofa’i o meatotino a le aiga na toesea i le gaioiga solitulafono e $8,697 tālā.
Na logo leoleo ma faia su’esu’ega ma molia ai loa le taulealea o Samuelu Emosi Togafau.
O le su’esu’ega na faia na iloa ai sa ia toese faamalama o le fale ma ulufale faamalosi ai i totonu ma faatino le solitulafono.
Sa molia muamua i ni solitulafono e tai tutusa ma le gaioiga na ia faia ae sa tuu avanoa iai lea sa auai i se a’oa’oga e toe faatonutonu ai lona mafaufau ma lana amio, ma sa nofo vaavaaia ai foi.
Peita’i o lona toe faia o lea solitulafono ua uma ai le avanoa ae tuusa’o loa i le falepuipui e tuli ai lona faasalaga e 2 tausaga ma le 4 masina.
O le faasalaga foi lea ua tuli ai ma lona moliaga o le umia o laau faasāina lea sa maua e leoleo o ia umia ni sikaleti maruana se lua i le taimi na pu’eina ai ma taofia mo su’esu’ega.
