Ua taofia mo le taimi nei le fuafuaga mo le fausia o se falema’i fou i Dunedin ona o faamatalaga o lea poloketi ua sili atu le tupe o le a faaalu ai nai lo le paketi sa faaagaaga e fausia ai.
O le minisita o le Infrastructure, Chris Bishop ma le minisita o le Soifua maloloina, Dr Shane Reti sa faalauiloaina lea faai’uga i le asō ma ta’ua ai o loo faatali nei le malo i fautuaga i ni vaega se lua mo le faia o le falema’i fou lea mai le vaegattupe e $1.88 piliona sa faataatia ese e fausia ai, peitai ua oo atu le tau fuafuaina i le $3 piliona.
Fai mai alii minisita afai ae faaauau pea i le tau lea o lona uiga o le a aafia atu ai ma galuega toe faaleleia o loo fia faia i isi falema’i.
O le poloketi lea na ioeina ai le faatupega e $1.59 piliona e le faigamalo talu ai, oo mai ia Mati o le tausaga nei, ioeina ai e le Kapeneta le isi $290 miliona e faaopoopo ane iai lea e maua ai le $1.88 piliona peitai e lē gafatia ai le fuafuaga o iai le falema’i fou lea ua ta’ua mo Dunedin, lea e ono oo i le $3 piliona ma avea ai o le falema’i aupito i taugata ua fausia i le itu i Saute o le atunuu.
O lea la o le a faatalia le isi laasaga e sosoo ai i lea galuega tele.
Puna o Faamatalaga: https://www.nzherald.co.nz/nz/politics/outrageous-local-mp-fumes-as-government-goes-back-to-the-drawing-board-on-dunedin-hospital-build/MAEWFUS43BFZ3NJ2A2G3HPV4LM/
