Ua lipotia e toeitiiti atoa le 500 o le aufaigaluega a le Qantas o le a savavali ese ma galuega i le asō ma ua alia’e ai ma ni popolega i aafiaga o lea tulaga i se tasi lenei o aso aupito pisi i femalagaa’iga.

O le asō e amata ai aso o faigamālōlōga o le taumafanafana ma ua ta’ua pe ā ma le 3.5 miliona tagata o le a femalagaa’i solo i Ausetalia i totonu o le isi ono vaiaso e amata i le asō.

Fai mai le 9News o le fuafuaga a le vaega o tagata faigaluega i le line maintenance a le Qantas na aga’i ese ai mai galuega mai le ‘afa o le 3 i le vaveao analeila seia oo i le ‘afa o le 7 i le taeao a taeao i malaevaalele i Sini, Melepone, Brisbane, Perth ma Adelaide.

O i latou ia e feagai ma le matafaioi o le tosoina ma le faatonutonuina o vaalele i le taimi e taunuu ai i malaevaalele.

O le solo tetee ua tuufaatasia e le Qantas Engineers Alliance o se soofaatasi o sui mai le Australian Manufacturing Workers Union ma le Australian Workers Union faapea foi ma le Electrical Trades Union.

Ua valaau ai i latou ia mo se siitaga e 5 pasene i le tausaga i totogi, fai mai a latou o le tulaga lea e ogatasi ai o latou totogi ma faatulagana a le auaunaga.

Puna o Faamatalaga: https://www.9news.com.au/national/qantas-strike-maintenance-workers-to-walk-off-the-job-major-airports/3c5eafe7-327e-48e8-accd-072844a74318