Tuuina atu le mataupu faasaga i sui o le Palemene i le komiti suesue mo iloiloga

I le taualumaga o le fono aoao a le Palemene i le taeao nei na faamanino ai e le afioga i le Fofoga Fetalai Papalii Li’o Ta’eu Masipa’u tulaga ua agai iai le mataupu o le faitioga tusitusia faasaga i sui mamalu o le maota.

O lea ua lipotia atu ai lenei mataupu e le Fofoga Fetalai i le fono aoao e faapea i le mae’a ai o iloiloga ua taunuu ai le faaiuga e faapea ua fesiligia tulaga aloaia o le Palemene i lenei mataupu. O lea la e tusa ai ma tulafono tumau 181 (2) o le a tuuina atu ai lenei mataupu i le Komiti o tulaga aloaia ma amio taualoa mo le iloiloina ma le toe lipoti atu i le isi toe tauaofiaga o le fono aoao i le aso e pei ona faatulai ai le lafo.

Na faatoa faailoa aloaia ai foi e Papalii suafa o sui mamalu o loo aafia i le mataupu e ui ua leva ona faailoa e ofisa faasalalau talu ona faailoa e sui o le vaega faaupufai e Puipuia Aiā Tatau o Tagata.

E pei ona silafia o lenei mataupu na tauala mai le sui usufono mo le itumalo palota Gagaemauga Nu.1 o le afioaga foi lea i le Sui Palemia Hon. Tuala Tevaga Ponifasio faasaga i le sui usufono mo le itumalo faapalota o Lepā Hon. Tuilaepa Lupesoliai Sailele Malielegaoi ma le sui usufono o le itumalo faapalota o Faleata Nu.3, tofa Lealailepule Rimoni Aiafi.

O vaega ia ma taiala na faamanino e le Fofoga Fetalai mo le iloiloga a le Komiti suesue i tulaga aloaia ma amio taualoa e aofia ai:

Silasila i le aafia ma le solia o tulaga aloaia o le fono aoao faitulafono i lenei mataupu.

Silasila i le aafia ma le solia o uiga lē migao faasaga i le Palemene i lenei mataupu.

Silasila i le aafiaga o tulafono o pule ma tulaga aloaia o le fono aoao faitulafono 1960 i lenei mataupu.

Silasila i aafiaga o se sui usufono ua faamaonia o le solia o tulaga aloaia o le fono aoao faitulafono ma uiga lē migao faasaga i le Palemene ona o lenei mataupu.

Silasila i aafiaga faaletulafono o lenei mataupu i se amioga poo ni amioga e lē tatau ona faia e se sui usufono o le Palemene.

Le tuuina mai o se faaiuga talafeagai e tusa ai o aafiaga o lenei mataupu

Ia toe lipoti mai le komiti suesue faapitoa i le fono aoao i le aso fono e sosoo ai.

Ua mae’a filifilia foi le Komiti suesue o le a feagai ma le mataupu e tusa ai ma tulafono tumau 177 ma o suafa nei o sui usufono ua tofia ma filifilia i le komiti o tulaga aloaia ma amio taualoa