Ua amata faagasolo le Koneferenisi tele a le Ekalesia Metotisi Aoao i Samoa ma atunuu e mamao, ina ua mae’a le Koneferenisi a faletua ma tinā o le Ekalesia le Auuso Fealofani, faapea ma le fa’au’uga a le Kolisi Faafaife’au i Piula, lea na faataunuuina i le Aso Toona’i ua mavae.
O se tasi lea o sauniga tāua i le masina lenei o Iulai e tauaofia ai le koneferenisi tele faaletausaga a le Ekalesia Metotisi, e talanoaina ai le atina’e o le ekalesia aoao, ma faataoto ai ana fuafuaga ma polokalame o le isi tausaga faale-ekalesia.
E toa sefulutasi A’oa’o ua maea le fa tausaga o a’oa’oga i totonu o Piula le Kolisi Faafaifeau a le Ekalesia Metotisi lea sa maua o latou faailoga tipiloma o le mataupu silisili. Ua maua ai foi tusipasi o le mataupu silisili mo alii A’oa’o o le vasega faavae poo le tausaga muamua, ae o faailoga tipiloma mo A’oa’o o le tausaga lua, ma le tolu.
O le lipoti a le Kolisi faafaife’au na faailoa ai e le faifeau pule le susuga Polofesa Mosese Mailo, o le vasega faavae fou o le a a’e i le mae’a o le koneferenisi tele ua mae’a ta’utinoga ma ua talia uma le toa sefululima na au i le suega ulufale.
E toatasi se A’oa’o sa faasala ua toe talia ai e ulufale mo le faaauauina o le taumafai i totonu o Piula. O le faauuga foi i le Aso Toonai na tauaao ai faailoga mo faafeagaiga e toalua ua maua faailoga o le Bachelor of Divinity, toalua faifeau ua faamanuiaina le taumafai i faailoga o le Bachelor of Divinity with Honours, ma le isi toalua o faafaifeau ua maua le faailoga taualoa i su’esu’ega o le mataupu silisili poo le Master of Theology.
O le kapeteni poo le Sili Aoao le Dux o le vasega faauu o le tausaga 2025 i le 2026 o le A’oa’o le susuga Nu’usa Joseph Nu’usa mai le Matagaluega a Saltlake i Hawaii.
O se vaega o le saunoaga faafetai mai le kapeteni o le sili aoao o le vasega faau’u a le kolisi faafaifeau i Piula le susuga Nu’usa Joseph Nu’usa mai le matagaluega a Saltlake i Hawaii Amerika.
