O le Aso Gafua o lenei vaiaso fou ua amata ai ona tagofia i su’esu’ega a le Faamasinoga Maualuga i Mulinuu, le lu’i a le Vaega faaupufai e puipuia aia tatau a tagata.
O se lu’i faaletulafono ua fesiligia ai le amiotonu o le faai’uga a le malo i le filifiliga o Taitaifono o Komiti a Fono Faavae, lea ua filifilia ai faipule o le itu faaupufai a le Malo ma sui sa tauva mo le Faatuatua i le Atua Samoa ua tasi i le palota tele e tauave tofiga taitaifono o komiti a fono faavae o loo vaaia le faagaioia o le atina’e o le manuia o itumalo poo le poloketi miliona, ae sui taitaifono faipule o le itu agai faapea faipule tutoatasi.
Ua mae’a ona faatulaga e le faamasinoga le faasino ala e faafoe ai lana su’esu’ega, e pei ona avea le itu faaupufai e puipuia aia tatau a tagata ma itu talosaga, o le sui faipule o Lotofaga sa avea ma Palemia, le afioga Fiame Naomi Mataafa, ua tuuina lana faamatalaga tauto e lagolago ai i le talosaga, o le vaega faaupufai o le Faatuatua i le Atua Samoa ua Tasi o le a avea ma itu e mataituina taualumaga o su’esu’ega i le puipuia o ni manaoga e faasino tonu i le pati faaupufai poo se intervenor, ae o le Loia Sili a le malo o le a finauina le itu a le malo o loo molia e faasaga iai le talosaga.
E lua i le tolu aso o le a tuuina atu ai folasaga ma finauga faaletulafono a loia o itu auai o lea mataupu tau faamasinoga o loo tuuaia ai le faaituau o le faaiuga i le filifilia o taitaifono o komiti o fono faavae.
