A o tālia le faailoa ai o le faamaoniga a le afioga i le Ao o le Malo o le faai’uga o le faiga filifiliga a Safata 2 e ala i lana palota laititi i le vaiaso ua mavae atu nei, o le mae’a o le faitauga aloaia i le Aso Toonai na faailoa ai i le faai’uga mai le ofisa o le Komisi o Faigapalota le mau pea o le finagalo lagolago o le itumalo i le afioga Tuia Pu’a Fuatogi Letoa na te tauave pea le tofi faipule o le itumalo palota i le paeaiga 18 a le palemene i le lagolago i le vaega faaupufai o le Faatuatua i le Atua Samoa ua Tasi. E 891 palota ua manumalo ai Tuia i le toe faia ai o le filifiliga a lea itumalo palota.
O le sui sa tauva tutoatasi le susuga Leleua Suataga Aso e 567 palota na ia maua ma le isi sui tauva tutoatasi le faletua o Toleafoa Losalia Sagalala Niumata na ia maua palota e 109. E tasi le 1,571 tagata sa palota i le faiga filifiliga a le itumalo peitai ua faailoa e le Komesina o Faigapalota i le faasilasilaga o le faaiuga aloaia e 4 palota ua faaleaogaina ae 1,567 palota ua faaaoga ona sa lelei ona faatino.
O le taunuuga o lea palota laititi ua manino mai ai o nofoa e lua o Safata 1 ma Safata 2 ua avea ma sui lagolago o le vaega faaupufai o le Faatuatua i le Atua Samoa ua Tasi. E leai se sui na tauva mo le vaega faaupufai e puipuia aia tatau a tagata i le faigafilifiliga a Safata 2 ua mae’a. O loo totoe ai nei palota laiti a itumalo faapalota o Vaimauga 3 ma Falealili 1 e lei faamautūina le aso ma le masina e faia ai.
