E silia ma le $500,000 tala le tau aofai o le fesoasoani a le Mālō o Ausetalia ua tuuina atu i le Matagaluega o Leoleo, Falepuipui ma le Ola Toefuataina i Samoa tauala atu i se faigapaaga a le Pulega o Leoleo a le atunuu ma le auaunaga faaleoleo a le Mālō o Ausetalia.
O lea foai o masini e pei o meapueata lele poo drones i le vaega laiti ma meapueata lapopoa o le a fesoasoani tele i suesuega a leoleo i solitulafono eseese aemaise lava i le sailia o nofoaga o loo totō ma faafailele ai laau ma fualaau faasaina.
Ua aofia ai foi ma masini e pue ai le saoasaoa o taavale afi, o uila vili vae mo galuega faaleoleo e taamilo ai i le taulaga e puipuia le saogalemu o meatotino ma le soifua lelei o tagata aemaise o isi ituaiga o masini e fesootai lava i galuega faaleoleo i le itu i le puipuiga.
Taua e le alii Minisita o Leoleo afioga Faualo Harry Schuster “O le agaga ia o le faafetai i le Mālō o Ausetalia mo lenei fesoasoani tele i le faigapaaga lea a le Mālō o Ausetalia ma le Matagaluega o leoleo i Samoa, o le tala sa’o a ia ana leai se fesoasoani lea maua mai i le vaega lea e faigata ia ona faatino galuega a leoleo.
Ua tele atu le effectiveness o tatou leoleo ua maua mai le fesoasoani lea e maua mai ia Ausetalia, o lea foi ua silasila le atunuu i drones ma mea ia faaaoga i poloka o le auala e le gata e faigofie ona faatino ai le galuega a leoleo ao se auala saogalemu e mafai ona faatino ai”.
Ua faailoa e le sui o leoleo a le Mālō o Ausetalia o le Aso 8 o le masina o Oketopa na toe saini ai le maliega e faaopoopo ai le isi fa tausaga o le fesoasoani a lea Mālō i le faipaaga ai ma le Matagaluega o leoleo i Samoa.
