Ua ma’ea ona asia e le Ta’ita’i o le Malo, le afioga i le Palemia susuga Laaulialemalietoa Leuatea Polataivao Fosi ma nisi ofisa sinia o le Pulega o Uafu ma Taulaga, le galuega o loo faagasolo o le toe faaleleia o nisi o vaega o le vaa la’upasese ma uta o le Aurora V lea na faatau e le faigamalo talu ai mai se kamupani i Ausetalia.
O galuega o loo faagasolo o loo faia i le nofoaga e toso va’a o le kamupani o le Polaris Marine i le setete o Niu Sa Uelese.
I le pepa faalauiloa mai le Ofisa Sooupu o le Malo o loo faailoa ai o le mae’a o galuega o loo toe faia i le va’a o le a maua ai se faaiuga mulimuli a le Malo. Ua faailoa ai foi i le faasalalauga le lagona talitonuina e le Palemia o le atunuu o le galuega o loo feagai ma le kamupani o loo faaleleia nisi o vaega o le va’a.
Sa autū le asiasiga a le taitai o le malo i le fia molimauina o le tulaga ua iai galuega ma le faamoemoe ia faamalieina uma tulaga lelei ma le saogalemu o le vaa mo le faaaogaina. Ua mae’a ona faailoa e le Palemia i se taualumaga talu ai nei a le Palemene, o le a faatau le vaa pe lisi ina ia toe faaola ai tupe a le malo na faatau ai.
Sa aofia i le au malaga na asia lea galuega le faauluuluga o le Pulega o Uafu ma Taulaga, o le Ta’ita’ifono o le Komiti Faafoe o le Pulega o Uafu ma Taulaga, o se alii kapeteni o vaa, ma le Minisita Lagolago o le Matagaluega o Galuega Tetele a le Malo.
