E sefulu tausaga le faasalaga maualuga o le solitulafono o le faomea poo le robbery lea o loo molia ai le afioga i le faipule o le Palemene, afioga Loau Keneti Sio, lea na tula’i i le Faamasinoga Maualuga i le Aso Gafua o lenei vaiaso.
O loo tuua’ia foi e leoleo Loau i le moliaga o le faaoolima ma le faamoemoe e faatino ai le solitulafono o le faomea.
O nei moliaga e lua e le’i mae’a faamautū iai tapenaga a loia a le itu a leoleo, le mafuaaga ua toe tolopo ai lenei mataupu i le aso 9 o le masina fou o Tesema.
Mo le silafia o loo molia le faipule ona o se tagi a se aiga i Faleula e mafua i se vevesi faalotoifale na aafia ai le aiga ua tagi ma lē ua molia.
O loo iai isi moliaga faasaga i le afioga Loau o loo taoto i le Faamasinoga Faaitumalo.
O le mataupu lenei o loo iai foi le tagi a le faipule ma lona faletua na faaulu i leoleo faasaga i le aiga o Pese Uele i tuua’iga o le faaoolima e pei ona molia ai tagata e to’afā o lea aiga.
O nei mataupu tau faamasinoga na mafua mai i se vevesi faalotoifale e fesoota’i i le faatama’ia o meatotino a lea aiga e aofia ai se fale i le malaia poo le afi.
O Iulai o le tausaga nei na tula’i mai ai lea gaioiga.
