Na tua leaga le faamanatuina o le 21 tausaga, i le uma ane ua maliliu ai alii e toalua ae manunu’a tigaina le toatolu.
O le aso fanau lenei i Gisborne i le po o le Aso Toonai, ma e faapea e tusa ma le toaselau tagata na auai ai.
I lipoti a leoleo o loo ta’ua ai, o le misa na tulai mai i lea lava po na iu ai ina maliliu tagata e toalua ona o manu’aga, ae faanatinati le isi toatolu i le falemai.
O tagata e toatolu o loo i le falemai o alii uma, 45 tausaga, 30 ma le 21 tausaga le matutua ma e faapea o manu’aga na tatui lea o loo tigaina ai.
Lipotia o le aso fanau i lea po o le toatele lava o tagata o le aiga, e ese ai tagata ese e toalua e lē o ni valaaulia.
O se faamaoniga mai leoleo ananafi e toatasi lē ua taofia nei ma fesiligia e tusa ma le mea na tupu.
