O le Aso Gafua a sau e fofogaina ai le talosaga o le taofi o le lauina o se faasalaga a le Faamasinoga Maualuga faasaga ia Mase Mahonri Schwalger sa avea ma faia’oga o le Manu Samoa, ae tagofia muamua le talosaga apili ua lu’i ai le faamaonia o moliaga o valu.
O le iloiloina pe talia le talosaga e toe iloilo le faai’uga ua faamaonia ai solitulafono e valu o le a su’esu’eina e le afioga i le Faamasino o le Faamasinoga Maualuga le afioga Fepuleai Ameperosa Roma, ae o le lauina o le faasalaga o le a faatino e le faamasino sinia le afioga Vui Clarence Nelson, lea o le a mae’a lona taimi galue i le faamasinoga i le masina nei o Iuni.
Ua malilie loia e toe foi atu le faamasino sinia e faia lea galuega pe a maua se i’uga pe talia pe teena le talosaga apiili.
O le faai’uga tusitusia i su’esu’ega a le faamasinoga i moliaga sa tuua’ia ai lē ua molia, e toe sa’ili atu i le po anapo ua aveesea ma le upega tafa’ilagi a le faamasinoga sa faasalalau faalaua’itele ai i le Aso Lua o le vaiaso nei.
