O le lauga a le sui faipule o Faasaleleaga 2, le afioga Vaaelua Senetenari Samau, i le tala autū o le tupe i le fonotaga a le Palemene i le asō, na ia ta’ua ai se tasi o faafitauli o loo aafia ai foi lona itumalo, o le faigatā ona sa’ili ni tagata e naunau e toe aga’i i uta e galulue i eleele o le itumalo.
Na ia ta’ua e ui i le taumafai e faalālā atu le $200 se totogi mo se tagata faigaluega, ae lē o faigofie ona toe maua nisi e toe fia foi e galulue i fanua i uta, ua ese suiga o lagona o tagata i nei aso.
Na ave ai lana tuualalo i le faigāmalo, pe lē mafai ona silasila e aumai ni tagata faigaluega mai nisi atunuu o loo manana’o e galulue, aemaise tagata mai le atunuu o Saina, e malolosi ona tagata ma naunau e galulue.
Saunoa le faipule, e mafai lava e Fono Faavae a itumalo ona vaaia lelei ma tausi na tagata mai fafo pe a aumai e galulue e toe lalaga le vao ma fai ni faato’aga e pei o laau’aina e faaaogā lelei ai fanua o nuu ma afio’aga o loo tele ae ua ausage tagata galulue.
Na tula’i le ta’ita’i o le malo le afioga i le Alii Palemia ma tali fuaitau i se mana’oga o le faipule o Faasaleleaga 2, na ia ta’ua ai, o se itu lelei e tatau ona toe māta’itū lelei.
Na ta’ua e le Palemia le tamaoa’iga maoa’e o Samoa na fausia e Siamani, le WESTEC, sa tua i tagata ese mai fafo e aumai ai tagata e galulue i le atina’eina o Samoa.
Na ta’ua e le Palemia tagata mai Saina, Tuvalu, Niue, Fiti, Elise, Solomona, lea e oo mai lava i aso nei o loo iai pea i Samoa i latou e tupu’aga mai na tagata.
Saunoa le Palemia i le sui faipule, e mafai lava e lona itumalo ona talosaga le aumai ni latou tagata mai fafo, e faaui atu i le Matāgaluega o Leipa, e aumai ai ni tagata mai fafo e galuea’iina laueleele o lona itumalo pe afai o le vaifofo lena o lea faafitauli.
