E matagofie le faafeiloa’iga a le atunuu i le taunuu atu i Samoa i le afiafi ananafi o le ulua’i malaga a le vaalele o le Qantas, lea ua tatala aloa’ia ai nei ana faigāmalaga tuusa’o atu mai Aukilani i Apia ma le toe foi mai, ma ua faapine ai foi se isi matāti’a tāua mo Samoa mo le atina’e a lana pulega o tagata tafafao maimoa asiasi aemaise le tāua mo le atina’e o le tamaoaiga o le atunuu.
O lea ua faatulaga e faatolu i le vaiaso ona faimalaga atu le Qantas i Samoa, i Aso Lua, Aso Tofi, ma Aso Sa.
Sa auai ane i le malaevaalele faavaomalo i Faleolo le pulega ma le aufaigaluega a le Turisi ma le Tausala o Samoa, e faatino le latou talimalo masani, i le faaula ma faafiafiaga, e faafeiloa’i māfana mai ai le mamalu o le auvaa na faafoeina atu lenei ulua’i faigāmalaga.
O se avanoa lelei o le a atili faafaigofie ai fesoota’iga i faigāmalaga i le va o atunuu e lua, mo tagata tafafao asiasi atu i Samoa, ae faapea foi i feoa’iga a aiga, tagata ta’ito’atasi ma le aufaipisinisi.
O se tala fiafia lea mo Samoa a o faatalitali ai pea le taimi o le a tino mai ai le moemitiga a le faigāmalo ina ia iai lava ni vaalele e patino ia Samoa i se taimi o i luma, lea foi na toe lōtea i saunoaga a sui faipule o le Palemene ia latou fonotaga ananafi ma le asō, ma toe tali ai foi le ta’ita’i o le Malo, poo ā lava ni lavelave o loo fai ma tula’i mai e ono faatelegese ai lenei fuafuaga, ae o le mea mautinoa, e taunuu lava e pei ona ua faatulaga ai vaega eseese e silasila i lea poloketi tele a le malo.
