Ua atofaina e le Faamasinoga Maualuga le aso 13 o le masina fou o Iulai e tagofia ai le su’esu’eina o le lu’i faaletulafono a le vaega faaupufai e puipuia aiā tatau a tagata ua fesiligia ai le filifilia e le malo o ta’ita’ifono e lē o ni sui faipule o le Palemene mo komiti o Fono Faavae o loo vaaia ma pulea le polokalame o le atina’e manuia o nuu ma afio’aga o itumalo faapalota e 51.
O le Aso Lulu o lenei vaiaso na toe valaauina ai le talosaga a le vaega faaupufai o loo agaia le malo mo le faatulagaina o tapenaga a loia a itu auai.
Ua fautuaina foi loia a le itu talosaga ina ia tuuina atu pepa o faamaumauga i le itu faaupufai o le Faatuatua i le Atua Samoa ua Tasi, e fesoota’i ai i ta’ita’ifono o loo faailoa i le talosaga tusitusia.
Ua taatia atu foi i loia se tuualalo a le faamasinoga ina ia sa’ili ni finagalo o sui faipule tuto’atasi ma le patī faaupufai o le Samoa ua Potopoto pe fia auai ma avea ma uō a le faamasinoga poo se intervener ae tuuina atu se talosaga.
O le aso 19 ma le aso 22 o Iuni ua tuu avanoa ai le faamasinoga i loia e faila atu ai tapenaga uma faatasi ai ma ni teuteuga faaopoopo i le talosaga autū, a o le’i faaooina atu se tali a le malo o loo molia lea o loo tula’i ai le Loia Sili ma se loia mai fafo.
O le aso 3 o Iulai e toe valaau ai le matāupu e faamautū uma ai tapenaga ma faailoa ai e loia a itu auai, po ua sauni i le su’esu’ega au’ili’ili o le talosaga lea ua faatulaga e amata i le Aso Gafua 13 o Iulai i le 10 i le taeao.
