Ua faailoa e le ta’ita’i o le Malo i le Palemene a o saunoa le faipule o Vaa o Fonoti le tofa Mau’u Siaosi Puepuemai i le tala faatatau autū o le tupe, ua iai le fuafuaga a le malo e suia le vaiaso masani o le Teuila ia Setema, i le vaiaso o polokalame o tu ma aganuu faa-Samoa.
Photos from previous Teuila Festival
Na faailoa lea fuafuaga e le afioga i le Palemia susuga Laaulialemalietoa Leuatea Polataivao Fosi ina ua ave le fautuaga i le malo a le sui faipule o Vaa o Fonoti, pe lē ua tatau ona faamuta le Teuila ae suia i se polokalame e faaolaola ai tu ma aganuu, ona o lana molimau i polokalame o le Tuto’atasi e ma’eu le taupati atu o le atunuu e lagolago ma auai.
Sa faailoa e le ta’ita’i o le Itu Agai sa avea ma Palemia ma minisita o tagata tafafao i paea’iga ua mavae a le Palemene, o ia foi na amataina le Teuila, na māfua ona faia lea polokalame e le malo ona o le taimi o Setema e pa’ū maualalo ai tagata tafafao e afea Samoa, ma o le māfua’aga lea o le Teuila e lē gata e faaolaola ai tu ma aganuu ae faatosina mai ai tulisi e malaga mai i Samoa i lea taimi o le tausaga.
O le tausaga nei ia Setema pe a aulia e atoa iai le 35 tausaga talu ona faatino e le malo le polokalame o le Teuila lea e taualuga i le tauvaga e sa’ili ai se Tausala o Samoa.
