O lea ua toe tolopo foi le fonotaga a le Palemene o Samoa seia aulia le Aso Tofi o le vaiaso nei ina ua faailoa se faai’uga a le Fofoga Fetalai o le maota, Papalii Ta’eu Masipa’u e faatatau i lafo e pei ona tuuina i le Palemene i le vaiaso nei.
Ua faailoa le faai’uga a le Fofoga Fetalai ina ia tolopo le fono ae fautuaina le toe tapena lelei o teuteuga o le lafo i se faiga tusitusia e le sui usufono mai Gagaifomauga Numera 3 ma le ta’ita’i o le Itu Agai ma ia faaoo atu i le Fofoga Fetalai ma kopi foi le failautusi o le fono a o le’i tāina le 12 i le aso a taeao, 5 o Mati.
E 2 itula na mālōlō ai le fono i le taeao analeila ae soalaupule nisi o mataupu ma o le toe amatalia atu na faia ai le saunoaga lea a le Fofoga Fetalai ma faamae’a ai ma le fonotaga i le asō.
