O se alii talavou 21 tausaga na nofosala muamua i le toese ona o solitulafono o le umia o laau ma fuaaau faasāina poo nakoti, ua toe maua e leoleo o ia umia foi nakoti o le aisa poo le methamphetamine e tusa lona mamafa ma le 0.016 kalama.
Na vili e nisi leoleo ina ua iai masalosaloga o loo faatau atu e Galuefa Ti’a Toese a o tūtū i luma o le faleoloa o Tina i Vaigaga, o le faamatalaga lea a leoleo i le faamasinoga.
Na oo atu iai malu o le malo ma saili le tino o le taulealea ma maua ai le aisa ma se paipa e faaaogā i lea pauta faasāina.
O le talavou o tausaga o Galuefa ua ave iai ma le fautuaga a le faamasinoga ia tuu nei le fiafia i nakoti, auā e lē toe foi i se lelei lona olaga ma sona lumanai, pe afai ua lotolotoi i ia solitulafono a o talavou le olaga, sa tatau ona faaaogā i se mea lelei mo lona aiga aemaise o sona lumanai manuia.
E 6 masina ua nofosala ai lea taulealea talavou i le falepuipui ma ua faatonuina a mae’a lona faasalaga ona auai atu lea i se polokalame e toe fuata’ina ai lona olaga ma ‘aloese mai le tagofia o nakoti.
