O le faaiuga o le vaiaso na faamaonia ma ripotia mai ai le faaopoopo o le isi to’a 3 ua aafia i le vairusi o le Koviti19 ma oo atu ai le fainumera o i latou ua aafia i le to’a 30.
O lea toatolu o nisi o le pasese o le malaga mai Brisbane Ausetalia i le Aso 19 o le masina nei e aofia ai ma se tamaititi e 4 tausaga le matua, ma ua auina atu nei i le nofoaga faapitoa i Motootua e faanofoesea ai.
O lona uiga ua to’a 25 tagata o le pasese ua aafia ma le to’a lima o ai tausi soifua a le atunuu. O le nofoaga faapitoa i le falemai tele i Motootua o loo faanofoesea uma ai i latou ua maua i le siama e aofia ai ma tausi soifua e to’alima.
E to’a 301 tagata o loo faanofoesea i le taimi nei e aofia ai le pasese e to’a 73 ma le silia i le to’a 260 o tagata faigaluega, i latou sa galulue i le taimi na taunuu ai le vaalele o le malaga mai Ausetalia lea ua savali nei i le lua vaiaso talu ona taunuu i le atunuu.
O suega poo tests na faia i le Aso Sa na sei mavae atu nei na maua ai le isi toatolu o le pasese iai aafia i le faama’i ae o loo tumau pea ona leai seisi o le aufaigaluega o aafia mai ia suega.
O le taimi lenei foi e pei ona faailoa mai e le Ofisa Sooupu a le Mālō e ala mai i le auaunaga o le Soifua Maloloina e le’i oo lava i tua le siama i le komiuniti ma o le Aso Faraile na tea nei na suia mai ai le vaega o laasaga o puipuiga o le atunuu mai le vaega tolu i le vaega lua.
