Ua fautuaina e le Afioga i le Palemia faaauau lē tumau susuga Tuilaepa Lupesoliai Sailele Malielegaoi le mamalu o le atunuu ina ia to’a pea le tai ae tuu atu pea i iai latou o faipule ua tofia e faato’afilemuina le atunuu.
O le auga o le faasalalauga tuusa’o a Tuilaepa i le taeao nei ona o se ripoti mai le matagaluega o Leoleo, lea e faapea ua iai nisi o malu o le Malo i le maota o le Ao o le Malo o Samoa i Vailele ona o puipuiga o le Aiga Tauaana.
E afua nei gaioiga a Alii ma Tamaitai Malu o le Malo , ona o le puipuiga o le saogalemu o le Ao o le Malo aemaise lava i taimi faapenei o le lē mautonu o se faigamalo.
O le talosaga a Tuilaepa , ” o le taimi foi lenei e faia ai le tiute a Alii ma Faipule o nuu taitasi ina ia to’a pea le tai ma ia nofo filemu pea Samoa”
Na faalia foi i le taeao nei manatu o le Aiga Faatuatua i le Atua Samoa ua tasi , tauala mai i le latou Sui Taitai Laaulialemalietoa Leuatea Polataivao Schmidt mo Samoa ina ia mau pea le toovae ma toafilemu pea ae o loo faasaga e toe tali i le isi lu’i a le HRPP lea ua toe apili ai faaiuga o le mataupu o le nofoa faaopoopo lea na tuuina mai i le Aso Gafua 17 o Me 2021.
O le tatalo a vaega faaupufai mo le atunuu atoa faapea i latou o loo aumau i atunuu i fafo ina ia nofo fealofani ma aua nei to’ia le va ae nofo onosai pea ao faagasolo ai finauga o le sailiga o se faigamalo mautu mo Samoa.
