Ua lipotia o loo tigaina i se falema’i i Kuiniselani se tamaitai mai Niu Sila e feta’ua’ina na aafia i se afi i lona lava fale.

Ua ta’ua e le RNZ o Destiny Otton Rakuraku, e 34 tausaga o le matua, o loo tigaina pea i le falema’i talu mai le osofa’iga o ia, fai mai lipoti o lē ua aafia e mai Aukilani ae ta’ua na faia ni finauga ma se alii i totonu o lona fale i Kingston i le itu i Saute o Brisbane i le taeao o le Aso Toonai.

O le faamatalaga mai le lipoti lea ua ta’ua ai sa sasaa e lea alii le penisini i le tamaitai ma tutu iai le afi se’i vaeane lau faafofoga, ma na vaaia e tuaoi le mea ua tupu ma tamomo’e ane ai e fesoasoani.

Ua iai se itulau o le Gofundme ua amataina e fesoasoani i ona togafitiga ma ua 18 afe ua mafai ona tuufaatasia e oo mai i le asō.

Ua molia ai e leoleo se alii e 36 tausaga o loo ta’ua i le 7News o Renata Menning le igoa ma o le asō ua fuafua e tula’i ai i le faamasinoga.

Puna o Faamatalaga: https://www.rnz.co.nz/news/world/539423/nz-woman-destiny-otton-rakuraku-fighting-for-life-after-she-was-allegedly-set-on-fire-in-queensland