O le tagata lona lua lea na māua i lipoti mai le vaiaso talu ai na taofia e leoleo ina ua masalomia e iai sona sootaga i le mataupu o loo agai i ai suesuega e leoleo i le taimi nei, ae o loo tetee i ai lea tagata i le moliaga.

O le mataupu lea na pueina ai ma taofia mai e leoleo se tasi tagata i le aso 10 o Mati, lea na maua mai le malaevaalele i Aukilani a o tau fuafua e malaga ese atu ma le atunuu.

E 40 tausaga o le tamaloa lea na taofia e leoleo i le Aso Lua talu ai, ma o le aso na sosoo ai, na tulai ai luma o le Faamasinoga Faaitumalo i Aukilani i moliaga o lona umia ma sapalaia lenei fualaau faasāina.

O loo faaauau ona taofia le faalauiloa o le suafa o lenei tagata lona lua e pei ona faamaonia ai e le faamasino Judge Peter Winter i le afiafi o le Aso Lua.

Ua tatala i tua lea tagata e faatali ai le aso e toe tulai ai luma o le faamasinoga mo le valaauga o lona moliaga, ae o loo iai aiaiga o le tatala i tua, e tatau ona lē mafai ona fesootai atu i le tagata lea na muamua taofia e leoleo, e 24 itula e taofiofia ai le toe fealuai atu i nisi lava mea se’i vagana le alu e faigaluega, ma o lea ua taofi uma e leoleo ona tusifolau ina ia lē mafai ona toe malaga ese atu ma le atunuu.

O loo agai suesuega a leoleo pe faamata o apa pia na maua i ai le fualaau faasāina o le methamphetamine poo le ‘aisa, na mafua ai le maliu faafuasei o si alii talavou o Aiden Sagala.

O Aiden Ma’aseia Iosefa Sagala, e 21 tausaga o lona soifua, na maliu i le aso 7 o Mati i le falemai i Aukilani, ina ua faafuase’i ona oso faama’imalosi i lona aiga ina ua faatoa uma ai ona inuinu sana apa pia i le afiafi ina ua mavana atu mai lana galuega.

Ua faamautinoa mai e leoleo e leai se sootaga o si alii talavou ua maliu ma le aumaia faasolitulafono o lenei fualaau faasāina i totonu o le atunuu e auala mai i le pia ua faamaonia le iai o lea fualaau faasāina.

O le tulai mai o lea faalavelave na faia ai loa suesuega a leoleo ma iloa ai na iai le vailaau faasāina o le meth i le apa pia na inu e Aiden, ma sa faamaonia foi mai se siaki o lana feauvai (tulou) sa filogia ai lea vailaau faasāina, o lea na alu ai se osofaiga a leoleo i lena lava vaiaso i se tasi o nofoaga e teu ai oloa mo se pisinisi i le tuatusi i Ryan Place i Manukau, lea na taofia ai e leoleo se uta o pailate o loo teu ai pusa o apa pia o le ituaiga o le Honey Bear House Beer, ma na maua ai i lena uta se vaega tele o lenei vailaau faasāina, le methamphetamine e tusa ma le 330kg.

O le apa pia o loo agai i ai suesuega, le Honey Bear House Beer, e lei iai se faamaoniga faapea ua faatau atu faalauaitele i totonu o faleoloa e faatau ai le ‘ava malosi poo luga o le initaneti, ae foliga o loo suesue pea e leoleo pe moni masalosaloga o ni sapalai o loo aumai ma tufatufua atu i na o ni tagata.

O loo augani mai pea leoleo i soo se tasi o loo ia silafia nisi faamatalaga atili i lenei mataupu ina ia faafesootai atu Leoleo o le 105 poo le Crime Stoppers i le 0800 555 111.