O se faifaatoaga mai Western Australia ua toe ta’utino i lona tuuina o se vailaau i le lata i le 70 laau i luga o se fanua faalauaitele i le itu i Saute o le setete ona o lona taumafai e faaitiitia lamatiaga o se afi e sasao ane i le togavao e ono aafia atu ai ma lona fanua.

O le 9News o loo lipotia ai le gaioiga a lea faifaatoaga na faia i laau e 69 i le fanua lea e lata i Albany, na maua atu laau ia ua vili iai ni pu ma faamaoniga o le vailaau o le herbicide glyphosate, o se vailaau e pepe ai laau.

O se gaioiga ua matuai lē fiafia ai le Albany Council ma saunoa ai le pulenuu o Greg Stocks o se gaioiga ua faaleaga ai le tele o laau ma o se osofaiga i le siosiomaga ma e matuai lē taliaina e le setete ma le komiuniti.

O le fai faatoaga o Peter Mullaly ua ia ta’utino i lea gaioiga ma ua lagona lona salamō ma ofo ane e toe faaleleia mea ua aafia.

O loo faaauau le suesuega i le mataupu ae o faasalaga o ituaiga soligatulafono faapea e ono oo atu i le $250 afe e totogi.

Puna o Faamatalaga: https://www.9news.com.au/national/redmond-wa-farmer-comes-forward-after-69-native-trees-deliberately-poisoned/8d5215b4-e26b-4bc0-9c77-d688486c24fc