E lē o toe mamao ae usuia le fono masani faaletausaga a ta’ita’i o Malo o le Pasefika le Pacific Islands Forum, o le auai le usugafono a Samoa e ta’ita’i e le afioga i le tamaitai Palemia, ma o se fonotaga o le a tele nisi o mataupu tāua o le a talanoaina ai.
O nisi o mataupu ua faailoa o le a soalaupule i le fono a ta’ita’i o malo o le Pasefika i le faai’uga o le masina nei, o le ofi atu o nisi o atunuu laiti o le Pasefika o loo avea ma teritori o le Iunaite Setete, o atunuu ia o Guam ma Amerika Samoa e avea ma sui o le fono a malo o le Pasefika.
Ua fuafua foi e faataatia i le laulau a fono a ta’ita’i o malo o le Pasefika i lea fonotaga le mataupu i le atunuu o Niu Kaletonia o se teritori o le Malo o Farani i le Pasefika, ma tulaga i vevesi o loo aafia ai upufai o lea atunuu.
O le fono a Minisita o le va i fafo o le Pasefika sa usuia i Fiti i le vaiaso na te’a nei, ua faia ai le iugafono e malaga le Palemia o le Malo o le Atu Kuki o loo seei nei i le nofoa o le ta’ita’ifono o le fono a malo o le Pasefika ma Palemia o Fiti ma Solomona e faatino se savali e faatalatalanoa ai vesiga i Niu Kaletonia a o lei usuia le fono a ta’ita’i i Tonga.
O le avanoa o lea savali ona ua iai se ioega a le Pelesetene o Farani e malaga se savali a malo o le Pasefika e faatalanoa le vala o loo aafia ai upufai o se tasi o teritori o lea atunuu i le Pasefika.
O le tulaga o loo aafia ai Papua i Sisifo poo West Papua lea o loo i lalo o pulega a le malo o Indonesia, ua iai le talitonuga o se isi lea o mataupu o le a asiasi iai talanoaga a ta’ita’i o malo o le Pasefika i lana fonotaga o sosoo ai nei i Tonga.
