Ua amata tapena auaunaga a kamupani vaalele o le Air New Zealand ma le Fiji Airways e tatala avanoa mo pasese o tagatanuu o Samoa i fafo o loo umia tusifolau Samoa faapea i latou o loo aogā pea o latou pemita e malaga mai ai, mo malaga faatulagaina o le aso 12 ma le 19 o le masina fou o Iuni, faapea malaga ua faatulaga mo le aso 7 ma le 21 o Iulai.
O loo faaalia lea tulaga i se faasalalauga faalauaitele mai le Faalapotopotoga o le aufaipisinisi i Samoa ina ua tuanai le faailoaina ai e le taitai o le Malo o teuteuga i poloaiga o vavao o le faama’i, ma faailoa ai le fuafuaga o le toe tatala o malaga masani faavaomalo ia Aokuso ma Setema o le tausaga nei.
Ua faailoa e le kamupani vaalele a Fiti o le aso 14 o le masina nei e amata ai ana malaga ta’i lua i le vaiaso i le va o Samoa ma Fiti. O le kamupani vaalele a Niu Sila ua ia faailoa o loo tumau pea aso mo ana malaga faapitoa i le aso 5 ma le 26 o Iuni faapea le aso 14 ma le 28 o Iulai. Ua faailoa foi e ia kamupani vaalele le amata tatala o avanoa e totogi ai pasese mo malaga agai mai i Samoa i le aso muamua o Aokuso peitai o loo fua le faatinoina o lea tulaga i nisi suiga o le a tulai mai.
