Ua mae’a tapena e leoleo le faamatalaga tusitusia a le sui faipule o Salega 2 o le Minisita o Galuega Tetele a le Malo, i le tagi ua faaulu e le tofa Olo Afoa Fiti Vaai, ua tuua’ia ai le faipule o Lepa ma le ta’ita’i o le vaega e puipuia aiātatau a tagata le susuga Tuilaepa L Sailele Malielegaoi, i lona faia o ni faamatalaga taufaaleaga i sana faatalanoaga ma nisi o tusitala.
O loo autū le tagi i se saunoaga a Tuilaepa na tuua’ia ai le Minisita o Galuega Tetele a le Malo i lona lesitalaina o se taavale pikiapu landcruiser i lona suafa ma avea ai o sana meatotino, ae o le taavale a le Malo.
Ua faamaonia mai e le tofa Olo le mae’a faia o lana faamatalaga tusitusia i le faai’uga o le vaiaso na te’a nei, ma ua faatali nei i le faagasologa o su’esu’ega a leoleo. Ua faailoa e le Komesina o leoleo le susuga Auapaau Logoitino Filipo i se lipoti a le nusipepa o le Sunday Samoan, o le tagi a le Minisita na faaulu atu i le lua vaiaso ua mavae, ma o loo faia iai su’esu’ega.
O se faatalanoaga ma le minisita talu ai nei na ia faailoa ai ni faamaumauga o le lesitala o lea taavale i le matagaluega o galuega tetele a le Malo, ma sa lesitala i le taimi o loo faatino ai e le vaega o taavale afi i le matagaluega o leoleo, le lesitalaina o taavale i le atunuu.
O lea ua toe foi lea galuega i le auaunaga a le Pulega o Fela’ua’iga i luga o le laueleele le Land Transport Authority.
