O le sailiga tupe muamua ua faatino e le komiti ua galulue nei mo le toe fausia o faleaoga ua faaletonu o le kolisi o Sagato Petelo Sanele i Moamoa, ma faaleleia ai isi vaega ua faaletonu o le lotoifale o le kolisi, ua maua ai le silia i le 150 afe tala.
O le Aso Toonai na te’a nei na faatino ai se leitiofoni i fesootaiga televavave na faaaogā ai le api o foliga le facebook ma maua ai lea seleni, peitai ua faaalia e se tasi o sui o le asosi o tama ma teine sa a’oa’oina i Sanele, e lei mae’a ona faamaopoopo foai mai le au lagolago o uo ma paaga a le kolisi aemaise o tama ma teine tuai.
O le tele o nisi o foai na tuusa’o i le teugatupe poo le account a le kolisi o loo i nisi o faletupe i le atunuu, ma e faatoa iloa se aofaiga i lenei vaiaso.
O loo tapena le isi sailiga seleni ua fuafua e malaga ai i Ausetalia ma Niu Sila faapea ma Amerika Samoa i le masina o Aokuso o le tausaga nei.
O le masina o Aperila na ave ai se tusi talosaga a le faauluuluga o le Puleaga a Samoa Apia o le Ekalesia Katoliko i lo tatou atunuu, ua faatagisia ai se fesoasoani tau tupe mo le toe faaleleia o faleaoga, ma isi auaunaga o le pulega o le kolisi o Sanele ona ua tu i le faaletonu ma tauau ina tapunia ai ma le kolisi, o se tasi o poutu o a’oa’oga i Samoa sa faafailele ai le ola a’oa’oina o fanau a le ekalesia ma le atunuu.
