E 15 itula na faia ai felafolafoa’iga mulimuli a le faigamalo a Vitoria a o le’i pasiaina loa tulafono fou e faatatau i tagata e tatala i tua mai le tulafono (bail laws) lea ua faamatalaina o tulafono aupito malolosi ia i Ausetalia.

O le taeao analeila na pasia aloa’ia ai talu mai feutana’iga a le Palemene a lea setete mai le po anapo.

Ua faaigoaina o bail amendment laws poo tulafono teuteu e faatatau i le tatala i tua o tagata mai le tulafono.

Ua faaautū ia tulafono ia i latou e toe soli foi le tulafono a o tatala mai i tua mai se isi mataupu atoa ai ma le solia o tuutuuga na tatala ai i tua.

O ia mataupu uma o le a faasalaina ai i le oo atu i le 3 masina i le falepuipui faaopoopo atu i se faasalaga o se mataupu e toe molia ai.

O le isi vaega o teuteuga afai ae maua e leoleo se tagata o loo tatala i tua ua solia tuutuuga o le tatala i tua, o le a mafai loa e leoleo ona ave sa’o i le faamasinoga nai lo le toe faatali foi o le taimi e faatino ai le faamasinoga.

O isi faamamafa o le tulafono fou lea ua aga’i sa’o ia i latou e solitulafono i le amataina o afi ma solitulafono e faaaogā ai fana, ma o le a silasila foi nei lava tulafono i le faaaogāina o agaese i soligatulafono.

Puna o Faamatalaga: https://7news.com.au/news/new-bail-laws-passed-in-victoria-following-15-hour-debate-in-state-parliament–c-18110159