O loo tapena le nuu o Apia e faamanatu le atoaga o le 100 tausaga o le taaloga lakapi i totonu o le afioaga, ma o se tasi o galuega o le a avea ma pine faamau o lea selau tausaga, o le umusaga o le fautasi fou o le nuu o loo fausia i le taimi nei.
O se tasi lea o afioaga e fiafia tupulaga e taaalo i soo se taaloga auā o se afioaga o loo avea foi ona eleele ma laumua o le atunuu, ae o tuuga fautasi o se tasi o faagatama sa lotolotoi ai foi i faigamea i le tai i tausaga ua mavae.
Ua faailoa i fesoota’iga tau faasalalauga a le Malo o loo pulea e le matagaluega a le Palemia ma le Kapeneta, tapenaga a le nuu o Apia e pei ona fausia ai ma lo latou fautasi fou.
O fautasi sa iai i tausaga ua tuanai a lea afioaga o le Littlerina lea ua foa’i i le afioaga o Toamua, o le fautasi o le Tamarina ma le Kionasina.
O le a iloa i le aso e umusa ai le Sa fou o le afioaga le igoa, ae o le faamoemoe o le toe fausia o lea fautasi, o le fia lagolago lava i tuuga fautasi i aso faailogaina o le atunuu e pei o Sisiga fu’a ma le Teuila.
