O le faamalosia o puipuiga o le siosiomaga faalenatura o Samoa mai aafiaga o oloa e gaosi mai i le uga le plastic, ua ave ai le lagolago malosi a le Pulega o Tagata Tafafao i le faasāina lea poo le tapu o soo se ipu e gaosia mai ai, e aofia ai ma fagu, ma taga pepa iila o loo faaaoga e tuu iai i totonu faatau.
Ua faailoa e le Pulega o Tagata Tafafao i ana faalauiloa o mea e tutupu ta’i masina, o lana lagolago ua tutu faatasi ai ma auaunaga uma o loo atinaeina le alamanuia tau tagata tafafao i Samoa e mafua ona o le puipuia lelei o le siosiomaga faalenatura o se tasi lea o mata’aga e sili ona fiafia iai turisi e malaga ma tafafao i atunuu o loo latou tausia le saogalemu o le ola faalenatura o laau, ma meaola o loo nonofo i le gataifale.
Mo le silafia talu ona faamalosia le tapu a le Matagaluega o Punaoa Faalenatura ma Siosiomaga ua tele ina usitaia e pisinisi le taofia o le aumai o oloa e gaosia ile uga e pei o ipu, ae ua le toe aumaia foi ni taga pepa iila o loo faaaoga e tuu iai faatau mai faleoloa.
Ua na o fagu pa’u o loo faatau ai vaiinu suamalie ma vaiauli o loo tele pea i lo tatou atunuu ma o nisi ia o uga o loo lapisia ai le laufanua faapea ma le gataifale.
Peitai o se galuega lelei o loo faafoe e auaunaga tumaoti o loo latou aoina fagupa’u uga ma faatau mai le atunuu ona latou ave lea i fafo i pisinisi o loo toe faaliliuina uga pe recycle. O le fautuaga ma le tuualalo a le Ofisa Sili o le Pulega o Tagata Tafafao i Samoa i lo tatou atunuu.
Ia galulue ma tutu faatasi e puipui le siosiomaga faalenatura mai ni aafiaga ona o oloa e gaosia i le uga.
