O le mae’a ai o le fonotaga i le va o le Matagaluega o Faamasinoga i Samoa ma le Faamasinoga a Niu Sila sa talanoaina ai teuteuga o le tulafono o le vaetamaina o tamaiti a le malo o Niu Sila ma taofia lē tumau ai le toe faia o ni vaetama mai Samoa mo Aotearoa.
Ua faailoa e le Ofisa Sili o le Matagaluega o Faamasinoga ma le Faafoeina o Mataupu tau i le Faamasinoga a Samoa (MJCA), o loo iai le fuafuaga poo le faaiuga o le tausaga nei e sainia ai le maliega i le va o atunuu e lua ona toe tatala ai lea o le faagaioia o talosaga.
O le vaiaso ua mavae na fono ai i Samoa sui o Matagaluega o Faamasinoga a Samoa ma Niu Sila faatatau i lea mataupu ma sa maua ai se avanoa e fesiligia ai le Ofisa Sili o le Matagaluega o Faamasinoga i lo tatou atunuu.
