Ua faailoa o le a lē mafai ona faaaogāina e se tamaitai o le a tauva i le tauvaga o le Miss Global le igoa o Samoa e tauva ai.
O lea tulaga na faailoa mai e le sui ofisa sili o le Kamupani telefoni o le Vodafone i se faatalanoaga ma tusitala i le Vaiaso nei.
Ua faailoa o se tulaga ua mae’a tuuina atu ai se faamatalaga mai le Malo o Samoa ina ia aua ne’i tauva se tamaitai e faaaogāina ai le igoa o le atunuu i le tauvaga lea o le a faia i Vietnam i le tausaga nei.
Na ta’ua e le sui o le Vodafone ua mafua ia tulaga ona o le tamaitai o le a tauva o loo faatupe mai se faalapotopotoga tuma’oti.
Na ta’ua o se tasi lenei o faalauiloa televave tele mo Samoa ona o lea ua malaga mai le tamaitai tausala o le Miss Global i Samoa ma ua fai foi la ma tepaaga o le lalolagi ma le tauvaga lenei, e ui i lea o le tamaitai o le a filifilia ma le tulaga o le a iai le tauvaga lenei o le a fua iai le toe faaauau ai ona lagolagosua le Vodafone mo se isi tamaitai e fai ma sui o Samoa i le lumanai.
A o sailia ai la se tamaitai ua faailoa e toatele o loo talosaga atu e fia agai i le tauvaga lea, ae o analeila lea na oo atu ai le Miss Global e tuuina atu lana meaalofa i le sosaiete o le Kanesa i Samoa.
E lei faailoaina pe fia le seleni ae na vaaia le agaga alofa ma le naunataiga e fia fesoasoani o le tamaitai i le sosaiete aemaise o tagata ua aafia.
O lana faasoa i lona aiga ma lona tina sa ma’umau lona soifua i lea faama’i na ia faailoa o se tulaga faigata a o tapena ai lea taimi e tauva i le tauvaga lea.
O le afiafi ananafi na fai ‘aiga afiafi ai lea tamaitai ma sui o ofisa faasalalau ma tusitala, o le auga o le malaga mai se’i tuuina atu i tamaitai Samoa le faaosofiaga ma le naunautaiga ia mafai ai ona faaaogā foi fola i le lalolagi e faalauiloa ai tu ma aga a le atunuu aemaise o tamaitai Samoa.
