Ua faamaonia mai e le Sui Komesina, Susuga Papalii Monalisa Tia’i Keti le molia ai o le toasefulufā mai le 18 na taofia, e aofia ai ni tamaita’i se toafā ma alii e toasefulu, i moliaga o le umiaina o meafaitino poo paipa e ula ai le aisa, faapea ma ni laau mariuana faapea ni fualaau faasāina o le aisa, atoa ai ma se laaumalosi.

Ua faamaonia foi le toe tatala ai i tua nisi e toafā mai le toasefuluvalu, na taofia e leoleo i le vaiaso ua mavae.

O lea toafā e aofia ai ma talavou i lalo o le 18 tausaga le matutua.

Na faailoa foi e le tamaitai Sui Komesina o i latou ua toe tatala i tua e lē o malosi tele se mau e faasaga atu iai.

O le a tutulai i latou i luma o le faamaisnoga i le amataga o le masina fou ae o loo taofia pea i lalo o le vaaiga a leoleo i le taimi nei.

O le osofaiga a leoleo na oo atu ai i se aiga e lata i moli faatonu taavale i le magafa i Malifa, poo le itula e lua i le aoauli o le Aso Faraile.

Na mafai ona maua i le osofaiga a le Matagaluega ni tupe, laau faasāina o le mariuana, aisa ma se auupega.

Sa faapea foi ona toe maua mai ai ma nisi o loo tatala i tua ma tuutuuga a le Faamasinoga.

O i latou ia na molia foi muamua ona o fualaau faasāina o le aisa, ma o loo tālia ai aso e suesueina ai a latou mataupu.