E 3 tausaga le matua o se tamaititi ua ave i Niu Sila mo togafitiga ona o se manu’a tugā i lona ulu, ae ua molia e leoleo le tamā o le tamaitiiti i le taumafai e faaoo le oti, umia o se aupega mata’utia, ma le moliaga o le faaoomanu’a tugā.
Ua faailoa e le Komesina o leoleo i se lipoti i le faai’uga o le vaiaso, o le misa a le tamaloa ma lona to’alua na togi ai e lē ua molia le fafine i se meafaitino malō, ae alu atu ai lavea le ulu o lona atalii, e faapea sa sii e le tina i le taimi o le la vevesi ma lona to’alua.
E pei ona silafia e iai foi se mataupu na oo i le faamasinoga ma faasala ai se tina i le falepuipui, ina ua faamaonia le uma o le ola o se tasi o lana fanau sa lavea i se maa na togi ai e le tina lana tama tama, ae alu atu le maa misi le atalii ae lavea ai lana tama teine.
O le aso 16 o le masina nei o Setema e tula’i ai le tamā ua molia e leoleo ona o le manu’a i le ulu o lona atalii lea ua ave mo togafitiga i Niu Sila.
