Ua lua tausaga talu ona fasiotia le talavou Hawke’s Bay ia Ariki Rigby, ae o lea faato’ā saisai mai e leoleo le alii 32 tausaga ananafi mai Favona i Aukilani.
O Setema o le 2022 na maua ai le tino maliu o Ariki na susunu faatasi ma le taavale o loo paka i Havelock North, ma i molimau a lona aiga e maua ua leai ni ona lima ma vae (tulou).
Mai lea taimi e lei faigofie i le aiga o le talavou ia Ariki, ma o le aso ananafi faato’ā faamaonia mai ai leoleo o lea ua molia i le fasioti tagata le alii 32 tausaga.
O lē ua molia e tula’i i luma o le Faamasinoga Faaitumalo i Manukau i le asō, ma o lea foi o loo faatalosaga leoleo ia toe auina atu i le Faamasinoga Faaitumalo i Napier e faaauau ai iloiloga faaletulafono.
O lē ua molia sa nofo i Hawke’s Bay i le taimi o le maliu o Ariki ae o Favona i Aukilani lea na maua mai ai e leoleo ananafi.
O le masina lenei e atoa iai le 21 tausaga o Ariki.
Puna o Faamatalaga: Ariki Rigby: Police charge man with murder of Hawke’s Bay teenager in 2022 – NZ Herald
