Ua amata tuli le faasalaga faafalepuipui e 88 masina poo le fitu tausaga ma le 4 masina o se tamā 45 tausaga lona matua, ina ua faamaonia e le Faamasinoga Maualuga lona ioeina o solitulafono o gaioiga fai faamalosi sa ia faia i se teineititi 11 tausaga le matua.
O lē ua molia ma faasalaina sa nonofo ma le tinā o le teineitiiti na aafia i le solitulafono.
Ua faaalia ai e le faamasinoga i lana faaiuga le faatupulaia pea o ia gaioiga ma aafia ai fanau teine laiti ma e le solomuli ai le faamasinoga i le faia o faasalaga e taofia ai ia faiga solitulafono.
O le tusi na tuuina atu e le faifeau ma le pulenuu e lagolago ai ni itu lelei o lē ua molia e le’i ta’ua ai lea tulaga, ae o le tusi mai le tinā o lē na aafia sa fa’ailoa ai o lē ua nofosala o se tagata alofa ma ua talia e lana fanau le faatoesega sa ia tuuina atu.
Peitai ua fesiligia e le faamasinoga le faamaoni o lea tusi ona o le lipoti a le ofisa faanofo vaavaaia o loo teena ai e lē na aafia se faatoesega na faia e lē ua molia.
O le faapea atu foi o le tusi mai le tinā o se tama e alofa e matuā fesiligia foi le moni ma faamaoni pe a fua i le solitulafono na tupu.
