O le aumai ai o fautuaga e tapenapena le atunuu i ni mala faalenatura e ono aafia ai Samoa ona o uiga o le tau ua faaigoaina o le Elenino (El Niño), ua faailoa ai e le Ofisa o le Vaaitau mūgalā o le a aafia ai le atunuu mo le tolu masina amata atu atu i le masina nei o Iulai e oo i le masina o Setema.
O le masina o Me o le tausaga nei lava na amata faamauina ai le itiiti o timuga na pa’ū i motu o Upolu ma Savaii faapea motu laiti o Manono ma Apolima.
O le vaaiga i le 3 masina o lumanai nei e i le va o le 60 il e 70 pasene o le a faaitiitia ai le suātimu e maua i motu uma o le atunuu. O lona uiga o le a lē maua le maualuga masani o le suātimu e palasi i totonu o ia masina o le tausaga.
Ua faailoa ai e le Ofisa o le Vaaitau lana fautuaga mo le atunuu i gaioiga e ao ona faatino i le amata atu i le mae’a o le masina e tasi o mūgalā, faapea i le 3,6, ma le 12 masina. O le auga o lea fuafuaga o le faasoasoaina tatau o le faaaogaina o le suāvai, auā a oo ina tulai mai mūgalā ma mago ai le laueleele i le leai o ni timuga e maua e ogaoga aafiaga o le a tulai mai.
Ua faailoa e le pulega o le vaaitau i lana pepa faalauiloa i le vaiaso ua mavae, o se tasi o aafiaga sili ona maaleale i le aafia ai o Samoa ma se vaega o le Pasefika i le Elenino o le faatupula’ia ai o matagi afā i le agai atu i le faaiuga o le tausaga ma le amataga o le tausaga fou.
