Ma’ea feiloaiga a nisi Minisita fou ma a latou Matagaluega

Ua maea le tele o feiloaiga a nisi o Minisita o le Malo fou  ae faapea Minisita lagoalgo ma a latou matagaluega taitasi e ala lea i le feiloai atu i le aufaigaluega ma faataatitia a latou polokalame mo le malo o Samoa.

O le amataga o le vaiaso na fai ai se sauniga lotu amata a le afioga i le tamaitai Palemia Fiame Naomi Mataafa, o lana Minisita Lagolago le afioga ia Manuleleua Paletasala Tovale ma Matagaluega faapea faalapotopotoga lea o loo i lalo o le la va’ava’aiga e aofia ai le Matagaluega o le Va i Fafo ma Fefaatauaiga, Ofisa o le Loia Sili, Ofisa o le Palemia ma le Kapeneta, O le Komesina o Sulufaiga , Komisi o tagata faigaluega, O le Matagaluega o Punaoa Faalenatura ma le Siosiomaga faapea le Pulega o tagata tafafao maimoa mai fafo.

O lenei sauniga lotu na faia lea i le maota tatalo o le Faavae i le Atua i le Aso 2 o Aukuso 2021. Na fautuaina ai e Fiame aufaigaluega atoa ina ia fai a latou tiute ma le faamaoni ma e manaomia le galulue soosootauau ma le felagolagoma’i aua lava le atinaeina o le malo o Samoa.

O le taeao nei lea na feiloai atu ai foi le afioga i le Minisita o Aoga Taaloga ma Aganuu Seuula Ioane, o le Minsita Lagolago Agaseata Valelio Tanuvasa Peto i la Matagaluega. Na faafeiloai foi i se ava o feiloaiga ma na taua e le afioga i le Minisita o loo avanoa lona ofisa pe afai e manaomia soo se ituaiga fesoasaoni ma aua nei fefefe e agai atu i lona ofisa o le faiga lena o le galuega fai faatasi.

Ae le gata i lea sa faia foi se feiloaiga a le Minisita o Fesootaiga ma Faamatalaga Faatekonolosi le afioga ia Toelupe Poumulinuku Onesemo ma le Minisita Lagolago Magele Sekati Fiaui i le la Matagaluega.

O le vaiaso na tea nei lea na faafeiloai ai foi le fofoga fetalai afioga Papalii Li’o Taeu Masepa’u ma le sui fofoga fetalai le afioga ia Auapaau Mulipola Aloitafua e le Ofisa o Faigapalota.

O le a faagasolo pea i le vaiaso nei feiloaiga faapitoa a Minisita taitasi, Minisita lagolago ma o latou matagaluega.