A o tālia ai nei se faai’uga a le Faamasinoga Maualuga i moliaga o le lē usita’ia o le faamasinoga poo le contempt of court o loo molia ai nisi o le afioaga o Afega, o lea ua faamautū nei aso e lua o le a tuuina atu ai mau ma finauga faaletulafono i le talosaga a le afioaga o Leauvaa, ua lu’i ai i le Faamasinoga Maualuga le faai’uga a le Faamasinoga o Fanua ma Suafa, faasino i eleele o le nuu o Afega e pei ona sa tula’i mai ai se feseesea’iga.

O le Aso Tofi ma le Aso Faraile o le vaiaso nei o le a iloilo ai lea mataupu o loo toe finauina ai e Leauvaa se vaega o eleele o loo nofoia ma faaaogā e nisi o aiga o le nuu.

O ia eleele ua mae’a faia iai le i’uga a le Faamasinoga o Fanua ma Suafa e pei ona iai le poloa’iga mo alii ma faipule o Afega e faataoto tuaoi o o latou eleele.

O le galuega lea e pei ona silafia na tula’i mai ai ni feseesea’iga i le va o nisi sa auai i lea galuega ma nisi o aiga o le nuu o Leauvaa.