E te lele lava ma le mautinoa ia iai se fuafuaga I lou faanofoesea atoa ai ma le iloa e ono lamatia I le faamai
O le tala mai lea ao faanofoesea ai le toatele o pasese feoai I vaalele I totonu o le atunuu, pei ona faamauina ai le 27 faigamalaga e oo mai I le aso ananafi na faimalaga ai pasese mulimuli faamaonia I le faamai I totonu o le tolu vaiaso talu ai
O pasese foi o loo feoai pea ua tatau ona faia ma le iloa ua iai tapenaga e faanofoesea ai mo le 10 aso pe afai ae mulimuli ane faafesootai atu e le soifua maloloina
Peitai I nei lapataiga o loo talitonu le alii suesue faapitoa ia Rod Jackson o le Iunivesite a Aukilani e maualalo le tulaga lamatia o pasese ua uma tui o le booster ma lelei ona faaaoga le ufi fofoga
O i latou foi o loo feoai mo tafaoga o lea ua tapena e le matagaluega taiala e fesoasoani ai I lo latou faanofoesea
Ese mai I le faanofoesea o pasese o lea foi ua amata faaleaogaina faigamalaga a vaalele a le Ea Niu Sila ona faatonuga e faanofoesea ua aafia ai le aufaigaluega
I luga o faasalalauga a le malaevaalele I Aukilani na faailoa ai e 10 lelei faigamalaga a le Ea Niu Sila faamoemoe I totonu lava o le atunuu na le taunuu ananafi, ae 4 na taua mai I le malaevaalele I Ueligitone
O ni suiga faatatope e le taumate o le a faaauau ai pea ona o aafiaga o le Omicron
