E le tau natia le le fiafia o le palemia o Ausetalia, Scott Morrison ile atunuu o Saina o nisi o a latou faasalalauga ua faailoa I le aso mai le ofisa faasalalau o le malo lea ua faailoa ai se cartoon fou ua upuia ai le fonotaga a le G7 na sei mavae atu nei lea na valaaulia ai Ausetalia.
O le cartoon poo le ata ua faaaoga ai le ata taatele a le alii tusiata Leonardo Da Vinci, le last supper lea e faata ai le tausamaaga mulimuli a Iesu ma ona soo. Ua faaigoa e Saina le ata o le Last G7 ma faaaoga ai ata o ulu o meaola tulou e sui tulaga I ata o le au soo e pei ona iai I le last supper.
O Ausetalia la ua faa ata I le manu o le kangaroo o loo aapa mai I tupe amerika o loo I luga o le laulau o le tausamaaga.O le faauigaina o le lua o foliga o ausetalia, two faced e pei ona manatu ai Saina.
E foliga ua atili ai ona le lelei le va o Saina ma Ausetalia mae na amata lava I feupuaiga I le va o sui o malo e lua I Canberra ma Beijing I le tausaga talu ai talu ona valaau Morrison e faia se suesuega tutoatasi I le amataga mai o le faamai o le koviti 19.
O le G7 poo le Group of 7 e aofia ai Kanata, Farani, Siamani, Italia, Iapani, Peretania ma Amerika ae sa valaaulia isi atunuu e toafa o Ausetalia, Aferika I Saute, Korea I Saute ma Initiia.O le fonotaga sa faia I le faaiuga o le vaiaso ma talanoaina ai mataupu e pei o le faamai aemaise o suiga o le tau.
