O le faauluuluga tau leoleo a Niu Sila, o le komesina foi lea, Richard Chalmers ua ia faamautinoa i ta’ita’i o leoleo a Fiti ma Samoa, o loo latou lagolago atu pea mo latou a o feagai ai ma matāupu tau fualaau faasāina i ia atunuu.

Ta’ua e le Radio NZ sa asia e le komesina atunuu e lua i le vaiaso talu ai ma faatalanoa ai le matāupu lea e uiga i fualaau faasāina, lona feavea’iina aemaise o matafaioi a le tiute ma ofisa su’esu’e i faiga lē amiotonu e tula’i mai.

Faailoa e le komesina o le Pacific Detector Dog Programme (PDDP) e naunau ia faaauau ma e maualuga le tulaga o iai lea polokalame i le lalolagi ma ua faaalu ai le lata i le $3.5 miliona a le malo o Niu Sila i lea poloketi.

Ua faailoa foi e se sooupu o lea polokalame ua lamalama faai’u le Vaega 1 peita’i o loo talanoa nei le matāgaluega o le va i fafo a Niu Sila ma leoleo mo le isi vaega e sosoo ai o lea polokalame.

Ua faailoa foi i lea lipoti o loo iai satini su’esu’e a Niu Sila o loo i Fiti e faia toleniga mo leoleo a lea atunuu, o loo iai foi sui o le matāgaluega i ofisa o leoleo i Suva ma Apia o loo galulue i le aoina o faamatalaga ma lona faasoasoaina.

Puna o Faamatalaga: https://www.rnz.co.nz/international/pacific-news/560331/nz-police-chief-pledges-ongoing-support-for-fiji-and-samoa