Ua faatonuina nei e le minisita o mataupu faalotoifale a Fiti, Pio Tikoduadua le faia o se su’esu’ega i se mataupu ua feta’ua’ina ai le faamatuu atu o tusifolau e le aufaigaluega a le immigration e aunoa ma se faatagana.

I se pepa o faamatalaga na faailoa ane i le po anapo na ta’ua ai e Tikoduadua o tusifolau o loo fesiligia na tuuina i tamaiti mai le South Korean Christian doomsday cult, le Grace Rd Church ma ua lipotia e iai sootaga i nisi o tuua’iga tau aiātatau.

O le vaiaso nei ua lipotia ai e le Fiji Times se faatalanoaga ma se tagata faigaluega i le Grace Rd Church ua ta’ua ai o ia ma isi na faaoolima iai nisi ma sa taofia o ia mai le oo atu e vaai lana fanau.

Fai mai lipoti e teena e le lotu lea ia faamatalaga ma ta’ua ai o le mataupu na talanoaina o se mataupu tau le aiga ma e lẽ o aafia ai i latou.

O le faamatalaga mai le minisita ua ta’ua ai o tusifolau o loo aofia i le mataupu lea sa faamatuu atu e aunoa ma sona iloa poo lana failautusi foi ma isi sinia o le matagaluega, ma ua ia faatonuina ai nei le faia o se su’esu’ega i le mataupu lea poo ai o loo aofia ai.

Ua faasee ese foi mai ona tofiga seia mae’a le su’esu’ega ma ua mae’a logoina le Palemia o Sitiveni Rabuka.

Puna o Faamatalaga: https://www.rnz.co.nz/international/pacific-news/534510/fiji-s-immigration-minister-steps-down-temporarily-over-unauthorised-passports-issued-to-doomsday-cult-members