O le tina ia Agnes Tauta Fruean o le ThisnThat Samoa, o se tasi lenei o faipisinisi i le atunuu na auai ma nisi o sui faipisinisi mai le Pasefika e ala i se avanoa mai le Pacific Forum Secretariat e auai ai i se tasi o faaaliga ua ta’ua o le Import Fair na faia i Korea Saute.
O oloa e pei o ato su’i, tautaliga e gaosi mai le popo, sikafu(scarf) ma sei na malaga ma lenei tina e faalauiloa i lenei faaaliga.
Na faaalia sona manatu e uiga i lenei faaaliga, “E tāua tele le Import Fair na auai atu ai.”
“E tele ni lesona ma mea aogā na maua mai ai, e pei o le iloa o oloa e taulia ma faatauina e lenei maketi.
“E fiafia tagata i oloa laiti e pei o ato tuu siliva (coin bags), tautaliga, faapea foi sei.
“E tele ma anoanoai oloa eseese ma tagata faatau i le atunuu o Korea, o le tele o tagata e faaaoga card mo faatauga, ae maua lava foi tagata o loo faaaoga pea le tupe poo le cash.
“O le toaele foi o tagata e fiafia i oloa tau cosmetics ma skin care. E maua foi tagata e fiafia i oloa e gaosia mai i laau poo oloa organic.”
O se taimi muamua lenei ua malaga ai i faaaliga tetele e pei o le Import Fair i Korea.
“O se taimi muamua lenei ua ou auai atu ai i atunuu i fafo i se faalauiloa faapenei.
“E avea ai le faafetai i le Pacific Forum Secretariat ma le KOIMA (Korea Association of Importers) mo lenei avanoa e faalauiloa atu ai foi oloa gaosia i Samoa.
“Aoga lava mo pisinisi laiti e faalautele ai le maketi o oloa ae le gata i lea o auala e mafai ona maketi ai.
“O ai lava se faipisinisi laititi e tuuina ai lenei avanoa ia faaaogā nei avanoa lē aumaua.”
O le pisinisi a lenei tina na amata mai i le 2021 e faailoga ai le tausaga muamua talu ona maliu si ona tuaa.
“Na faavae mai lenei pisinisi e mo na o se auala e maua ai sina vaega tupe e fesoasoani ai i le aiga ae peitai o le pisinisi lenei ua avea ma fesoasoani tele e tausi ai le aiga.
“E toatolu matou suisui ia ma le isi toalua o loo aoao i le taimi nei o a matou ato o loo alumia i le taimi lenei e fai lava e matou le design ma le sikaili faatasi ai ma manaoga lava o a matou tagata faatau i vaega e mananao e foliga mai ai le oloa.”
E tele nisi o Matagaluega a le Malo, o faalapotopotoga ua mafai ona ave iai le auaunaga a lenei pisinisi.
